Самарқанддаги ҳибсхонада туман газ ходими вафот этгани айтилмоқда
Zamon.uz ҳолат бўйича изоҳ олиш учун вилоят ИИБ билан боғланди. Маълумотларга кўра, марҳумнинг қандли диабет касаллиги бўлган.
Ижтимоий тармоқда Самарқанд вилоятининг Каттақўрғон тумангаз таъминоти корхонаси ходими Каттақўрғон шаҳридаги ҳибсхонадан ўлик ҳолда чиққани айтилган хабарлар тарқалмоқда.
Манбаларга кўра, марҳум Қодиржон Хайруллаев 35 ёшда бўлган. Бугун соат 16:00 да марҳумнинг жанозаси ўқилиб, сўнгги манзилга кузатилган.
У бундан бироз аввал туман ҳокимининг йиғилишларидан бирида, ҳокимлик залида қўлга олингани, айни пайтда у айбланаётган моддалар бўйича тергов жараёни кетаётган бўлгани айтилади.
Zamon.uz ҳолат бўйича изоҳ олиш учун Самарқанд вилояти ИИБ ахборот хизмати билан боғланди.
Билдирилишича, айни пайтда ҳолат юзасидан прокуратура органлари томонидан тергов ишлари олиб борилмоқда.
Вилоят матбуот хизмати раҳбари марҳумнинг қандли диабет касаллиги бўлганини ва шу касалликдан вафот этгани хабар қилинганини қўшимча қилган.
