Тошкентда ЙТҲ оқибатида Gentra мажақланиб кетди
Яккасарой туманида 3 та машина иштирокида жиддий авария юз берди. Бир киши тан жароҳати олиб, унга биринчи тез тиббий ёрдам кўрсатилган.
Кеча, 21 февраль куни Тошкент шаҳрининг Яккасарой туманида 3 та автомобиль иштирокида йўл-транспорт ҳодисаси содир бўлди. Бу ҳақда шаҳар Йўл ҳаракати хавфсизлиги бошқармаси хабар берди.
Қайд этилишича, соат 21:35 ларда Яккасарой тумани Нукус-Глинка чорраҳасида 1988 йилда туғилган Т.Б. бошқарувидаги Cobalt, 1989 йилда туғилган Й.У. бошқарувидаги Nexia-3 ва 2007 йилда туғилган А.О. бошқарувидаги Gentra автомашиналари ўзаро тўқнашган.
ЙТҲ оқибатида Gentra транспорт воситаси ҳайдовчисига биринчи тез тиббий ёрдам кўрсатилган.
ЙТҲнинг келиб чиқиши сабаби: Gentra русумли транспорт воситаси ҳайдовчиси ўзи билан бир йўналишда ҳаракатланиб келаётган Nexia-3 русумли транспорт воситаси билан ЙТҲ содир этиб, руль бошқарувини йўқотган ва қарама-қарши томонда турган Cobalt русумли транспорт воситаси билан тўқнашиб, ЙТҲ содир этган.
Ҳозирда ҳолат юзасидан Тошкент шаҳар ИИББ ЙҲХБ масъул ходимлари томонидан суриштирув ишлари олиб борилмоқда.
