Трампнинг қароргоҳига бостириб кирмоқчи бўлган йигит отиб ташланди
У ярим тунда президент қароргоҳи олдида қўлида милтиқ билан пайдо бўлган.
21 февралдан 22 февралга ўтар кечаси АҚШ Президентининг Флоридадаги шахсий қароргоҳи ва дам олиш маскани — Мар‑а‑Лаго атрофида фавқулодда ҳолат юз берди. Соат тахминан 1:30 да 20 ёшлар атрофидаги йигит ов милтиғи ва ёнилғи тўлдирилган идиш билан қароргоҳда пайдо бўлган.
Уни икки нафар Махфий хизмат агенти ва шериф ўринбосари тўхтатиб, қўлидаги нарсаларни ташлашни буюрган. Йигит идишни ерга қўйган, бироқ ов милтиғини “ўқ узиш позициясига” кўтарган пайт ҳуқуқ-тартибот ходимлари томонидан отиб ташланган. Оқибатда йигит воқеа жойида вафот этган.
Манбаларга кўра, у америкалик—Аустин Тускер Мартин бўлиб, Шимолий Каролинадан бўлган. Йигитнинг оила аъзолари уни бир неча кун олдин йўқолган деб хабар қилган.
Воқеа содир бўлган пайт президент Доналд Трамп ва унинг рафиқаси қароргоҳда бўлмаган. Улар Вашингтондаги Оқ уйда эди.
Айни пайтда маҳаллий ҳуқуқ-тартибот органлари воқеа сабабларини аниқлаш бўйича суриштирув ишларини бошлаган. Йигитнинг мақсади ҳозирча мавҳумлигича қолмоқда.
