Ўзбекистонликлар рамазонда бериладиган ёрдам пули бўйича фирибгарликдан огоҳликка чақирилди

Аввалроқ Президент қарори билан муқаддас Рамазон ойи арафасида аҳолининг ижтимоий ҳимояга муҳтож қатламларига бир марталик моддий ёрдам берилиши белгиланганди.

 

Экспертлар бундай хабарлардан сўнг фирибгарлар турли йўллар, ҳатто сохта (фейк) сайтлар яратиб, пулни ўғирлашга уринишлари мумкинлигидан огоҳлантирди.

 

Фирибгарликдан ўзингизни қуйидагича ҳимоя қилишингиз мумкин:

 

— Ҳеч қандай ариза шарт эмас: Пул маблағлари 1 мартга қадар сизнинг ижтимоий картангиз ёки пластик картангизга АВТОМАТИК тушади.

 

— Агар сизга "пулни олиш учун ариза беринг" дейишса — бу ёлғон!

 

— СМС-кодни берманг: Банкдан ёки 5500 хизматидан келган махфий кодни ҳеч кимга (ҳатто ўзини банк ходими ёки маҳалла раиси деб таништирса ҳам) айтманг.

 

— Шубҳали ҳаволаларга кирманг: "Тўловни қабул қилиб олинг" деган мазмундаги Телеграм-ботлар ёки расмийга ўхшаш сохта сайтларга карта маълумотларини киритманг.

 

— Олтин қоида: Агар сиздан пул тушириб бериш учун код сўрашса ёки қайсидир сайтга карта рақамингизни ёзишни талаб қилишса, билингки — қаршингизда ФИРИБГАР турибди!

 

Шахс ижтимоий реестрга киритилган оила аъзосими ёки йўқлигини расмий my.gov.uz портали орқали текшириши мумкин. Давлат ташкилотлари сизга ҳеч қачон "пулингизни олиш учун ҳаволага киринг" деб СМС юбормайди.

 

Қарорга кўра, “Ижтимоий реестр”даги давлат таъминотида бўлган оилаларга, ўзгалар парваришига муҳтож ёлғиз кексалар ва ногиронлиги бўлган шахсларга ҳамда етим ва ота-она қарамоғидан маҳрум бўлган болалар яшаётган оилаларга 1 миллион сўм миқдорида бир марталик ёрдам пули берилади.

 

Шунингдек, “Ижтимоий реестр”даги камбағал оилаларга, “Маҳалла еттилиги” томонидан шакллантирилган қўшимча рўйхатдаги эҳтиёжманд оилаларга 500 минг сўм миқдорида (бир марталик) ёрдам пули тўланади.

 

Бундан ташқари, реестрдаги оилаларнинг 6 минг нафар бемор аъзоларига даволаниш харажатлари тўлиқ қоплаб берилади.