Эрон Россия билан 500 млн евролик махфий битим тузди
Унга кўра, Россия компанияси Эронга уч йил давомида қурол-яроғ етказиб беради.
Эрон ва Россия ўртасида қурол-яроғ етказиб бериш бўйича 500 миллион евролик махфий битим тузилди. Бу ҳақида Россия ҳужжатларига ҳамда битим тафсилотларидан хабардор бир неча манбага таяниб, Financial Times нашри ёзмоқда.
Шартнома шартларига кўра, Россиянинг “Рособоронекспорт” давлат компанияси Эронга уч йил давомида — 2027 йилдан 2029 йилгача, 500 та “Верба” зенит-ракета мажмуаси ва 2,5 мингта 9М336 ракеталарини етказиб беради.
Ҳужжатларда битта ракетанинг нархи 170 минг евро, учириш қурилмаси эса 40 минг евро деб кўрсатилган. Шартноманинг умумий қиймати эса 495 млн еврони (тахминан 586 млн доллар) ташкил қилади.
Теҳрон Москвага мазкур шартнома бўйича расмий сўровни ўтган йилнинг июл ойида Исроил билан “12 кунлик уруш” тугаганидан кўп ўтмай юборган. Бунга Эроннинг ҳаво ҳужумидан мудофаа тизими сезиларли даражада заифлашгани сабаб қилиб кўрсатилмоқда.
