Наманганда эҳтиёжманд оилалар учун ифторликлар ташкил этилмоқда
Шунингдек, кам таъминланган оилалар ҳолидан хабар олиниб, уларга озиқ-овқат жамланмалари тарқатиляпти.
Наманган вилоятида “Рамазон — меҳр-мурувват, аҳиллик ва шукроналик ойи” шиори остида ифторликлар ташкил этилмоқда. Бу ҳақида вилоят ҳокимлиги хабар қилди.
“Рамазон – хайр-саховат, меҳр-муҳаббат улашиладиган ой. Бу ойда кўнгли ўксиклар, эҳтиёжманд, кам таъминланган оилалар ҳолидан хабар олиниб, уларга яхшиликлар қилинади.
Наманган вилоятида ҳам кам таъминланган оилалар ҳолидан хабар олиниб ифторликлар ташкил этилмоқда. Хусусан, вилоят бош имом-хатиби Абдуллоҳ домла Саматов Янги Наманган тумани Ахсикент маҳалласида яшовчи эҳтиёжманд оила хонадонида бирга ифторлик қилиб, Рамазон ҳадялари топширди.
Худди шундай хайрли тадбирлар Наманган шаҳри ва туманларида ҳам ташкил этилди. Кечанинг ўзида бош имом-хатиблар томонидан умумий ҳисобда 14 та оилага кирилиб, озиқ-овқат жамланмалари туҳфа қилинди”, дейилади хабарда.
