Непалда автобус дарёга қулаб, ўнлаб одам ҳалок бўлди
Расмийларга кўра, автобусда 40 дан ортиқ йўловчи бўлган.
Непалнинг Дҳадинг туманида йўловчи автобуси дарёга қулаб тушиши оқибатида камида 17 киши ҳалок бўлди, яна 24 киши жароҳатланди. Бу ҳақда маҳаллий ОАВ хабар берди.
Маълумотларга кўра, автобус Покҳарадан Катмандуга кетаётган эди, фожиа 22 февраль куни соат 19:45 атрофида Притҳви автомагистралида содир бўлган.
Расмийлар автобусда 40 дан ортиқ йўловчи бўлганини билдирган. Ҳалок бўлганлар орасида хорижий фуқаролар ҳам борлиги айтилмоқда Жароҳатланганлар яқин атрофдаги шифохоналарга ётқизилган.
Воқеа жойига Непал полицияси ва маҳаллий қутқарув хизматлари жалб этилган. Қутқарув ишлари тунги вақт, мураккаб рельеф ва кучли оқим сабаб қийинлашган.
Ҳозирча ҳолат юзасидан тергов ишлари давом этмоқда.
