Самарқандда ука ўз акасини милтиқ билан отиб ўлдириб қўйди
Ҳодисага улар ўртасида ариқдан сув ўтказиш масаласида юзага келган низо сабаб бўлган.
Самарқанд вилоятининг Нарпай туманида ука ўз акасини ов милтиғи билан отиб ўлдириб қўйди. Ҳолат юзасидан Бош прокуратура матбуот котиби Ҳаёт Шамсутдинов Zamon.uz'га маълумот берди.
Қайд этилишича, воқеа 12 февраль куни соат 11:30 ларда Нарпай тумани “Ҳўжакарзон” маҳалласи “Асилбек олтин балиқлари” фермер хўжалиги ҳудудида юз берган.
Фуқаро А.С. ариқдан сув ўтказиш масаласида акаси У.С. билан ўрталарида келиб чиққан келишмовчилик сабабли у билан тортишиб, жанжал вақтида ўзига тегишли “ИЖ-18” русумли ов қуроли билан У.С.га бир маротаба ўқ узиб, уни қасддан ўлдирган.
Суд-тиббиёт экспертиза бўлинмасининг дастлабки маълумотида, марҳум У.С.нинг танасида, яъни калла, юз, бўйин аъзоларининг очиқ шикасти, пешона чап лунж иккала елка бўғини олд юзаси, ўнг елка соҳаларида ов қуролидан ўқли шикастланиш, очиқ калла мия шикасти, пешона суягини очиқ синиши бош мия тўқимасини ўқли шикастланиши, юз суякларини очиқ парчаланиб синиши, 4 ва 5 бўйин умуртқаларининг парчаланиб синиши, орқа миянинг ўқли шикастланиши ташхиси қўйилиб, унинг ўлими ташқи қон кетишидан келиб чиққанлиги кўрсатилган.
Мазкур ҳолат юзасидан 2026 йил 12 февраль куни Нарпай туман прокуратураси томонидан А.С.га нисбатан ЖКнинг 97-моддаси 1-қисми билан жиноят иши қўзғатилиб, у ЖПКнинг 221-моддаси тартибида ушланган.
