Сурхондарёда “Менинг мактабим” лойиҳаси доирасидаги коррупцион схема фош бўлди

Сурхондарё вилояти таълим соҳасида йирик коррупцион схема фош этилди. Бу ҳақида “Vodiy24” нашри хабар бермоқда.

 

Қайд этилишича, вилоят Мактабгача ва мактаб таълими бошқармасининг собиқ бошлиғи Ҳ.Мамадиев ҳамда Термиз шаҳар бўлими собиқ раҳбари С.Рўзиқулов катта миқдордаги пора билан ушланган.

 

Тергов маълумотларига кўра, коррупцион схема Жарқўрғон туманида амалга оширилган “Менинг мактабим” лойиҳаси доирасида шаклланган. Мамадиев боғчаларга компьютер ва бошқа техник жиҳозлар етказиб бериш бўйича ўтказилган тендерларда тадбиркорларга “ёрдам бериш” эвазига тизимли равишда пул талаб қилиб келган.

 

Мансабдорлар жами 111 200 АҚШ доллари ҳамда 567 млн сўмни пора тариқасида олаётган вақтда ҳуқуқни муҳофаза қилиш органлари томонидан ашёвий далиллар билан ушланган.

 

Жиноят ишида Термиз шаҳри Мактабгача ва мактаб таълими бўлими собиқ бошлиғи Сирожиддин Рўзиқулов ҳам иштирок этган. Қизиқ жиҳати, Рўзиқулов 2025 йил октябрь ойида ўз лавозимидан тантанали равишда, совға-саломлар билан кузатилган эди.

 

Ҳозирда иккала мансабдорга нисбатан Ўзбекистон Республикаси Жиноят кодексининг 210-моддаси 2-қисми (Пора олиш) бўйича жиноят иши қўзғатилган. Ушбу модданинг тегишли бандлари (такроран, жуда кўп миқдорда ва бир гуруҳ шахслар томонидан содир этилгани) оғир жазо чораларини назарда тутади.

 

Тергов ҳаракатлари давом этмоқда. Бу воқеа таълим тизимидаги тендер жараёнлари шаффофлиги масаласини яна бир бор кун тартибига чиқарди.