Тошкентда тақиқда турган ерни 9 млн долларга сотмоқчи бўлган аёллар ушланди
Улар олдиндан 200 минг АҚШ доллари олган вақтларида қўлга тушган.
Тошкентда ер майдонини 9 млн АҚШ долларига сотмоқчи бўлганларнинг ноқонуний ҳаракати фош этилди. Бу ҳақида ДХХ матбуот хизмати Zamon.uz'га маълум қилди.
Қайд этилишича, муқаддам бир неча маротаба судланган аёл ўзининг таниши билан тил бириктириб, Юнусобод туманидаги тадбиркорлик субъектига тегишли бўлган, лекин, ҳозирда тақиқда турган 2 гектар нотурар ер майдонини харидорга 9 млн АҚШ долларига сотишга келишган.
Улар мансабдор танишлари орқали барча ҳужжатларни тайёрлаб, турар жой тоифасига ўтказиб бериш эвазига олдиндан 200 минг АҚШ доллари олган вақтларида Давлат хавфсизлик хизматининг Тошкент шаҳар бўйича бошқармаси ҳамда Иқтисодий жиноятларга қарши курашиш департаменти ходимлари томонидан ашёвий далиллар билан ушланган.
Ҳозирда ушбу шахсларга нисбатан Жиноят Кодексининг 168-моддаси 4-қисми “а” банди ва 28,211-моддаси 1-қисми билан жиноят иши қўзғатилиб, тергов ҳаракатлари олиб борилмоқда.
