Урушга бориб, жароҳат олиб қайтган андижонлик йигит 3 йилга қамалди

Жиноят ишлари бўйича Андижон вилояти Бўстон тумани судида урушга ёлланиш бўйича айбланган 23 ёшли йигитга нисбатан жиноят иши кўриб чиқилди.

 

Иш ҳужжатларига кўра, судланувчи 2025 йил январь ойида ишлаш учун Россияга борган. У ҳужжатларни расмийлаштириш учун мурожаат қилганида, унга депортация қилиниши ва Россия Федерацияси ҳудудини тарк этиши кераклиги айтилган. Бироқ пул зарурати туфайли у ишлашда давом этган.

 

Кейинчалик у ишлаш учун Домодедово шаҳрига йўл олган, Истра шаҳрида уни ҳуқуқ-тартибот идоралари ходимлари тўхтатиб, ҳужжатлари йўқлиги сабабли полиция бўлимига олиб кетишган.

 

Судланувчининг сўзларига кўра, уни қандайдир ҳужжатга имзо қўйишга мажбур қилишган, шундан сўнг уни Варожник посёлкасига олиб кетишган. У ерда унга ҳарбий кийим, телефон ва банк карталари берилган ва ҳарбий тайёргарлик ўтказилган.

 

Кейин бошқа одамлар билан бирга Луганск шаҳрига олиб кетилган. 8 май куни уларга дрон ёрдамида зарба берилган. У яширинишга уринган, бироқ дрондан ташланган бомба портлаши натижасида оёғидан жароҳат олган. Шундан сўнг у Луганск касалхонасига юборилган. Кейинчалик у Москвага бориб, Ўзбекистонга чипта сотиб олган ва уйига қайтган.

 

У қилмишидан пушаймонлигини билдириб, унга озодликдан маҳрум қилиш билан боғлиқ бўлмаган жазо тайинлашни сўраган.

 

Суд фуқаро о.Х.ни ЖКнинг 154-моддаси 1-қисмида (ёлланиш) назарда тутилган жиноятни содир этганликда айбдор деб топди. Унга 3 йил муддатга озодликдан маҳрум қилиш жазоси тайинланди.