Жиззахда фуқаро бошқа одамга кредит олиб бериб, ўзининг машинасидан айрилди
Маълум бўлишича, амалда кредитни бошқа шахс олган ва тўламасдан қолдирган.
Жиззах вилоятининг Шароф Рашидов туманида фуқаро бошқа фуқарога кредит олиб бериб, ўзининг машинасидан айрилди. Бу ҳақида МИБ ахборот хизмати Zamon.uz'га маълум қилди.
Қайд этилишича, Фуқаролик ишлари бўйича суд қарорига асосан, банк фойдасига қарздор А.И.дан кредит қарздорлигини “KIA K5” русумли автомашинага қаратиш тўғрисидаги ижро варақаси Мажбурий ижро бюросининг Шароф Рашидов тумани бўлими иш юритувига келиб тушган.
Олиб борилган мажбурий ижро ҳаракатлари давомида қарздорга тегишли “KIA K5” русумли автомашина туман ҳудудида ҳаракатланаётган вақтида аниқланиб, жарима майдончасига жойлаштирилди.
Келгусида автомашина аукцион савдолари орқали сотилиб, тушган маблағ ҳисобидан мавжуд кредит қарздорлиги қопланиши режалаштирилмоқда.
Қарздорнинг айтишича, автомашина унинг номига расмийлаштирилган бўлиб, амалда кредитни бошқа шахс олган ва тўламасдан қолдирган.
