Халқаро стандартлар асосида муҳандислар тайёрлаётган Самарқанд халқаро технология университети 4 йиллигини нишонлади
Университетда АҚШ, Полша, Италия, Ҳиндистон, Жанубий Корея ва Жанубий Африкадан келган профессор-ўқитувчилар талабаларга халқаро стандартлар асосида таълим бермоқда.
Халқаро стандартлар асосида муҳандис кадрлар тайёрлашни мақсад қилган олийгоҳда дунёнинг турли давлатларидан келган хорижий профессор- ўқитувчилар фаолият олиб боради.
Университет ўқув режа ва дастурларининг қарийб 99 фоизи хорижий техника университетлари билан ҳамкорликда, жаҳон стандартлари асосида ишлаб чиқилган. Бугун бу ерда АҚШ, Полша, Италия, Ҳиндистон, Жанубий Корея ва Жанубий Африкадан келган мутахассислар талабаларга таълим бермоқда.
Азим кентдаги илк хусусий олий таълим муассасаси Самарқанд халқаро технология университети ташкил этилганига тўрт йил тўлди.
Бу даврда университет мустаҳкам пойдевор яратиб, аниқ стратегик мақсадларни белгилаб олди.
Таълим жараёни амалиётга йўналтирилган ва дуал таълим тизими асосида ташкил этилган. Натижада талабалар халқаро форумлар, конференциялар ва хакатонларда муносиб ютуқларга эришмоқда.
Университет ўзининг 4 йиллигини тантанали равишда нишонлади.
Тадбирда халқаро илмий ва таълим ташкилотлари вакиллари, оммавий ахборот воситалари, хорижий ҳамкорлар, университет жамоаси, талабалар ҳамда уларнинг ота-оналари иштирок этди.
Тантанали тадбир аввалида университет ҳомийлар кенгаши раиси, Компаниялар гуруҳи Бош директори Бахтиёр Фазиловнинг табриги ўқиб эшиттирилди.
Университет ректори, профессор Юсуф Абдуллаев ўз сўзида университетнинг шаклланиш босқичларига алоҳида тўхталиб, эришилган ютуқларини тилга олиб келгусидаги ривожланишнинг стратегик йўналишлари ҳақида гапирди.
Тадбирда энг юқори натижаларга эришган бўлган талабалар, университет профессорлари ҳомийлар кенгаши раиси томонидан тақдирланди. Тантанали тадбир талабалар ижросида университет гимни билан якунланди.
