Нью-Йоркда сўнгги 9 йилда кузатилмаган қор бўрони қайд этилди
Қор қалинлиги 55 сантиметрдан ошган. Шаҳарда фавқулодда ҳолат эълон қилинган.
Шимоли-шарқий Америкага ёпирилган қор бўрони Нью-Йорк шаҳрини фалаж ҳолга келтириб қўйди. Бир қанча ҳудудларда қор қалинлиги 55 сантиметрга яқин ёки ошиб кетгани қайд этилди, бу шаҳарда сўнгги тўққиз йил ичида кузатилган энг юқори кўрсаткич.
Шаҳар мери Зохран Мамдани фавқулодда ҳолат эълон қилиб, 22 февралдан бошлаб жамоат транспорти ва шахсий автомобиллар ҳаракати деярли тўхтатилганлигини маълум қилди. Мактаблар ёпилди, дарслар бекор қилинди ва аҳолига уйда қолиш тавсия этилмоқда.
Бўрон шиддат билан кучайиб, соатига 5–8 сантиметр қор ёғиши кузатилди. Кучли шамол туфайли йўлларда кўриш имконияти жуда чекланган.
Ноқулай об-ҳаво шароити ҳаво транспорти тизимига жиддий зарба берди. Нью-Йоркнинг йирик аэропортларида бир куннинг ўзида 5 000 дан ортиқ авиарейслар бекор қилинган.
Метеорологик хизматлар қор бўрони ҳақида огоҳлантиришларини эълон қилди. Кўп штатларда фавқулодда ҳолат эълон қилиниб, йўлларда фақат зарур хизмат транспорти учун рухсат берилди.
Шунингдек, кучли шамол ва қор натижасида электр таъминоти узилиб, юз минглаб одамлар электрсиз қолган жойлар ҳам бор.
