“Путин Киевни уч кунда эгаллашини айтганига тўрт йил тўлди” — Владимир Зеленский

 

Украина президенти Владимир Зеленский урушнинг тўрт йиллиги муносабати билан халққа видеомурожаат қилди. Мурожаат ҳаво тревогалари пайтида ишлатиладиган ва офиси жойлашган бункердан йўлланди.

 

Президентнинг сўзларига кўра, 2022 йил 24 февралда Россия президенти Владимир Путин Киевни уч кунда эгаллашини ваъда қилган.

 

"Бугун Путин Киевни уч кун ичида эгаллаб олганига роппа-роса тўрт йил бўлди. Ва бу бизнинг қаршилигимиз, Украинанинг шу вақт ичидаги кураши ҳақида кўп нарсаларни айтиб беради. Бу сўзлар ортида миллионлаб халқимиз, буюк жасорат, меҳнатсеварлик, чидамлилик ва Украина 24 февралдан бери босиб ўтган узоқ йўл турибди", дейди Украина президенти.

 

Президент видеомурожаатда бункердаги иш тартиби ва урушнинг дастлабки кунларидаги бункерда юзлаб одамлар ҳар куни ҳарбий йиғилишлар ва стратегик қарорлар билан шуғулланиши, дунё етакчилари билан телефон ва видеомузокаралар олиб борилгани, қурол-яроғ, дори-дармон ва озиқ-овқат етказиш масалалари ҳал қилингани каби воқеаларни эслади.

 

Зеленский шунингдек, Украина халқининг бирдамлигини таъкидлаб, оқ байроқ кўтармагани, балки кўк-сариқ байроқни ҳимоя қилганини билдирди. Президент урушнинг оғир таъсирини эслатиб, тинчликни ва барқарор келажакни яратиш зарурлигини қайд этди.

 

Урушнинг 1 462 куни давомида Украина халқининг жасорати ва мустақилликни ҳимоя қилишдаги фидойилиги дунё ҳамжамиятига намуна бўлмоқда. Зеленский барча украинларни бирдамликни сақлашга, уруш тугагунча қатъият билан қаршилик кўрсатишга чақирди.

 

“Биз мустақиллигимизни ҳимоя қилдик, давлатимизни йўқотмадик, Путин мақсадларига эриша олмади. Украина халқини синдира олмади. Биз тинчлик ва адолатга эришиш учун барча чораларни кўрамиз. Украина шон-шарафга лойиқдир!”, дея таъкидлади Украина раҳбари.