Россияда ўзбекистонлик мигрантлар ўрдакча юришга мажбурланди

Россиянинг Волгоград вилоятида ўтказилган рейд давомида 34 нафар Ўзбекистон фуқароси Россия ҳудудида ноқонуний яшаб келгани аниқланди. Маҳаллий фуқаро уларга кўмаклашгани маълум бўлди.

 

Маълумотларга кўра, Волгоград вилоятининг Иловлинский туманида ҳуқуқ-тартибот идоралари ходимлари иссиқхона хўжаликларида миграция қонунчилигига риоя этилишини текшириш мақсадида рейд ўтказган. Текширув давомида хориждан келган айрим ишчилар Россияда бўлиш қоидаларига амал қилмагани аниқланган.

 

Ички ишлар бош бошқармаси эълон қилган суратларда инсон ҳуқуқлари бузилиб, мигрантларга нисбатан “ўрдак юриш” амалиёти қўлланганини кўриш мумкин.  

 

Ушбу ҳолатга 56 ёшли деҳқон-фермер хўжалиги раҳбари сабабчи бўлган. У 34 нафар Ўзбекистон фуқаросини рўйхатга қўйишда уларга яшаш жойи тақдим этилгани ҳақида маълумот берган. Бироқ амалда улар рўйхатда кўрсатилган манзилда эмас, балки иссиқхоналар яқинида яшаб келган.

 

Айни пайтда ҳолат юзасидан текширув ишлари олиб борилмоқда. Маҳаллий фуқаро содир этган қилмишини тан олди. Унга нисбатан Россия Федерацияси Жиноят кодексининг 322.3-moddasi (“Чет эл фуқаросини Россия Федерациясида турар жой бўйича сохта рўйхатга қўйиш”) билан жиноят иши қўзғатилди. Эндиликда фермер 5 йилгача озодликдан маҳрум этилиши мумкин.