Украинани тиклаш салкам 600 млрд долларга тушади
Маблағнинг кўп қисми урушдан кейинги даврда транспорт соҳасини тиклашга йўналтирилади.
Россия билан уруш натижасида вайрон қилинган Украина ҳудудларини тиклаш учун 588 миллиард доллар керак бўлади. Бу ҳақида Украина, Жаҳон банки, Еврокомиссия ва Бирлашган миллатлар ташкилоти томонидан тайёрланган ҳисоботда сўз боради.
Украина бош вазири Юлия Свириденконинг сўзларига кўра, бу сумма мамлакатнинг 2025 йилги номинал ялпи ички маҳсулотидан деярли уч баравар кўп.
Ҳисоботга кўра, маблағнинг кўп қисми урушдан кейинги даврда транспорт соҳасини тиклашга йўналтирилади. Ундан кейин уй-жой сектори, савдо ва саноат, шунингдек, қишлоқ хўжалиги туради. Портлашлар оқибатларини бартараф этиш ва ҳудудларни миналардан тозалаш учун қарийб 28 миллиард доллар зарур бўлади.
2025 йилда эълон қилинган маълумотларда Украинани келгуси ўн йил ичида тиклаш учун тахминан 524 миллиард доллар талаб этилиши айтилган эди. Бу сумма ҳозирда уруш давом этаётгани ва етказилган зарар ортиб бораётгани сабабли ошган.
