Бошпанасиз ҳайвонларни ҳимоя қилиш масаласи юзасидан Тошкент шаҳар ҳокимига сенатор сўрови юборилди

 

Тошкент шаҳрида бошпанасиз ҳайвонларни муҳофаза қилиш, сақлаш ва парваришлаш масалалари юзасидан Сенатнинг Аграр, сув хўжалиги ва экология қўмитаси раиси Анвар Тўйчиев томонидан Тошкент шаҳар ҳокими номига сенаторлик сўрови юборилди.

 

Қайд этилишича, сўнгги йилларда пойтахтда қаровсиз жониворларни ҳимоя қилиш, уларни сақлаш ва парваришлаш масаласи долзарб аҳамият касб этиб бормоқда. Фуқаролик жамияти институтлари, кўнгиллилар ҳамда ҳайвонсевар фаоллар томонидан ўз маблағлари ва ташаббуслари асосида бошпаналар ташкил этилиб, жониворларни парваришлаш, эмлаш ва даволаш ишлари олиб борилмоқда.

 

Шу билан бирга, ўтказилган таҳлиллар Тошкент шаҳрида қаровсиз ҳайвонларни сақлаш ва парваришлаш учун мавжуд инфратузилма етарли эмаслигини кўрсатмоқда. Хусусан, мавжуд парваришхоналар сони ва уларнинг сиғими эҳтиёжни тўлиқ қопламаётгани, айрим ҳолатларда шаҳар ва туман ободонлаштириш бошқармалари томонидан қаровсиз ҳайвонларни овлаш, сақлаш ҳамда нобуд бўлган ҳайвонларни утилизация қилиш жараёнларини ташкил этишда камчиликлар кузатилаётгани таъкидланган.

 

Бундан ташқари, айрим фуқаролар томонидан ҳайвонларга нисбатан шафқатсиз муносабатда бўлиш ҳолатлари қайд этилаётгани жамоатчиликнинг ҳақли эътирозларига сабаб бўлаётгани ҳам алоҳида қайд этилган.

 

Мазкур ҳолатларни инобатга олган ҳолда, сенаторлик сўровида Тошкент шаҳрида қаровсиз ҳайвонларни сақлаш ва парваришлашга мўлжалланган питомниклар ташкил этиш билан боғлиқ муаммолар, мавжуд парваришхоналар сони ва сиғими, ушбу соҳага ажратилаётган маблағлар, масъул идоралар ўртасидаги ҳамкорлик даражаси, шунингдек, нодавлат нотижорат ташкилотлари ва фаоллар ташаббусларини қўллаб-қувватлаш борасида амалга оширилаётган ишлар ҳамда келгусидаги режалар юзасидан асослантирилган маълумот тақдим этиш сўралган.