Бухорода сохта эҳсон видеолари орқали 161 млн сўм ўзлаштирган шахс қўлга олинди
У ижтимоий тармоқларда бемор болалар номидан жойлаштирилган хайрия видеоларини монтаж қилиб, банк карта рақамларини ўзгартириш орқали фуқаролар юборган пулларни ўзлаштириб келган.
Тошкент вилояти ИИББ Рамазон ойи муносабати билан фуқароларни янги турдаги киберфирибгарлик ҳолатларидан огоҳ бўлишга чақирди. Вилоят ИИББнинг Ахборот технологиялари соҳасидаги жиноятларга қарши курашиш бошқармаси томонидан ўтказилган мониторинг ҳамда фуқаролар мурожаатлари асосида олиб борилган тезкор-қидирув тадбирлари натижасида навбатдаги кибержиноят фош этилди.
Аниқланишича, Бухоро вилоятида яшовчи, 2004 йилда туғилган шахс Инстаграм ижтимоий тармоғида бемор болалар номидан жойлаштирилган хайрия видеоларини юклаб олиб, уларни қайта монтаж қилган. У асл видеолардаги банк карта рақамларини ўзгартириб, ўрнига бошқа карта маълумотларини жойлаштирган ва фуқаролар томонидан юборилган маблағларни ноқонуний равишда ўзлаштириб келган.
Дастлабки суриштирувларга кўра, мазкур шахс 2025 йил октябрь ойидан жинояти фош этилгунга қадар онасига тегишли банк картасига қарийб 2 мингга яқин транзакция орқали жами 161 миллион сўм миқдорида пул маблағларини туширган ҳамда ушбу маблағларни шахсий эҳтиёжлари учун сарфлаб юборган.
Ҳолат юзасидан Ўзбекистон Республикаси Жиноят кодексининг 168-моддаси 3-қисми «г» банди билан жиноят иши қўзғатилган бўлиб, ҳозирда тергов ҳаракатлари олиб борилмоқда.
