Мексика ҳукумати Илон Маскни судга бермоқчи
Бунга миллиардернинг Мексика президентини танқид қилгани сабаб бўлган.
Мексика ҳукумати америкалик миллиардер Илон Маск томонидан президент Клаудия Шейнбаумга қилинган айбловлар ортидан унга ҳуқуқий чоралар кўришни кўриб чиқмоқда. Бу ҳақда Мексика раҳбари ўзининг эрталабки матбуот анжуманида маълум қилди.
Ҳамма нарса Маскнинг ижтимоий тармоқда Шейнбаумни наркокартеллар билан алоқадорликда айблаши билан бошланди. Маск президентнинг эски видеоларидан бирига изоҳ ёзиб, уни “ўз картель бошлиқлари айтганини такрорлаётган одам” дея танқид қилди. Аммо бу иддаога ҳеч қандай аниқ далил келтирмади.
Шейнбаум эса бу айбловни “асоссиз ва ахмоқона” деб атади ҳамда ҳукумат адвокатлари ҳозирда мумкин бўлган суд ишини чуқур кўриб чиқаётганини билдирди.
“Биз буни судга бериш имкониятини кўриб чиқмоқдамиз. Бизнинг ҳуқуқшунослар ҳозир бунинг устида ишлаяпти,” — деди Шеинбаум матбуот анжуманида.
Президент Мексикадаги хавфсизлик сиёсати ва наркокартелларга қарши кураш бўйича ўз позициясини яна бир бор ҳимоя қилди, ва айбловлар мустақил суд тизими орқали текширилиши кераклигини таъкидлади.
