Наманганда Рамазон ойи муносабати билан 67 мингдан ортиқ оилага моддий ёрдам етказилиши режалаштирилган

 

Ўзбекистон Президенти қарорига мувофиқ, муқаддас Рамазон ойи муносабати билан аҳолининг эҳтиёжманд қатламларини қўллаб-қувватлаш мақсадида бир марталик моддий ёрдам ажратиш чоралари белгиланди. Мазкур ташаббус орқали жамиятда меҳр-оқибат ва ижтимоий бирдамлик муҳитини янада мустаҳкамлаш кўзда тутилган.

 

Қарорга асосан, давлат томонидан ижтимоий ҳимояга муҳтож фуқаролар, жумладан, ижтимоий реестрда рўйхатда турган оилалар, ёлғиз ва кекса фуқаролар, ота-она қарамоғидан маҳрум бўлган етим болалар тарбияланаётган оилаларга 1 000 000 (бир миллион) сўм миқдорида бир марталик моддий ёрдам ажратилиши назарда тутилган. Шунингдек, ижтимоий реестрдаги камбағал оила тоифасига кирувчи ҳамда маҳалла еттилиги хулосасига асосан қўшимча шакллантирилган оилаларга 500 000 (беш юз минг) сўмдан моддий кўмак берилади.

 

Хусусан, Наманган вилоятида дастлабки ҳисоб-китобларга кўра, қарийб 67 мингдан зиёд оилага ушбу бир марталик моддий ёрдам етказилиши режалаштирилган бўлиб, бунинг учун жами 45,5 миллиард сўм маблағ йўналтирилади. Тўловлар 1 мартга қадар фуқароларнинг ижтимоий карталари ёки банк пластик карталари орқали ўтказиб берилиши белгиланган.

 

Юртимизда турли миллат ва элат вакиллари аҳил-иноқ яшаб, муқаддас Рамазон ойининг шукуҳи ҳар бир хонадонга кириб бормоқда. Давлат томонидан кўрсатилаётган бундай эътибор ва ғамхўрлик фуқароларнинг ижтимоий ҳимоясини таъминлаш, уларни қўллаб-қувватлаш ҳамда жамиятда меҳр-оқибат муҳитини янада кучайтиришда муҳим аҳамият касб этмоқда.