Санкт-Петербургда ўзбекистонлик қаҳрамонга соддалаштирилган тартибда Россия фуқаролигини бериш таклиф қилинди

 

Россия Давлат Думаси депутати Николай Новичков Санкт-Петербург шаҳрида болани ҳалокатдан қутқариб қолган ўзбекистонлик Хайрулло Ибoдуллаевга Россия фуқаролигини соддалаштирилган тартибда бериш масаласини кўтаришни таклиф қилди.

 

Депутатнинг таъкидлашича, Хайрулло Ибoдуллаев кўрсатган жасорат алоҳида эътироф ва мукофотга лойиқ. У бу ҳақда ТАСС агентлигига берган изоҳида қаҳрамонлик кўрсатган шахсларга нисбатан рағбатлантирувчи механизмлар қўлланилиши зарурлигини қайд этди.

 

Эслатиб ўтамиз, жорий йил 22 февраль куни Санкт-Петербург шаҳрида етти ёшли бола кўп қаватли уйининг еттинчи қаватидаги деразадан йиқилиб тушган. Ўша ҳудудда кўча супурувчи бўлиб ишлайдиган 36 ёшли Хайрулло Ибoдуллаев тезкор ҳаракат қилиб, йиқилаётган болани ушлаб қолган.

 

Депутат сўзларига кўра, бундай жасорат кам учрайдиган ҳодиса бўлиб, камида давлат мукофоти ва жамоатчилик ҳурматига муносибдир. Шу муносабат билан, агар қаҳрамон бундай истак билдирса, унга фуқароликни соддалаштирилган тартибда бериш масаласини кўриб чиқиш мумкинлиги таъкидланган.

 

Шунингдек, Маргарита Симонян маълумотига кўра, Ибoдуллаевга қаҳрамонлик кўрсатган шахслар учун бериладиган Тигран Кеосаян мукофоти доирасида 1 миллион рубль пул мукофоти топширилган.

 

Санкт Петербург губернатори Александр Беглов Ўзбекистон фуқаросига “Қутқарувдаги жасорат учун” кўкрак нишонини ҳам топширган.

 

Шунингдек, Ўзбекистон томонидан ҳам ушбу жасорат юқори баҳоланиб, Президент Шавкат Мирзиёев фармонига мувофиқ Хайрулло Ибадуллаев «Жасорат» медали билан тақдирланди. Хайрулло Ибодуллаевга Ўзбекистонга қайтиш авиачиптаси совға қилинган.

 

Қаҳрамоннинг ўзи оммавий ахборот воситаларига берган интервьюсида рус тилини мукаммал ўрганиш ҳамда келгусида Россия фуқаролигига ариза топширишни режалаштираётганини маълум қилган.