Тошкент-Душанбе йўналишида давлат автобуси қантови йўлга қўйилди
Қатновлар ҳозирча ҳафтасига икки марта амалга оширилади.
24 февраль куни Тошкент–Душанбе йўналишида халқаро автобуслар илк рейсини амалга оширди. Бу мазкур йўналишдаги биринчи давлат автобуси ҳисобланади.
Қатновлар ҳозирча ҳафтасига икки марта — сешанба ва жума кунлари соат 17:00 да Тошкентдан амалга оширилади. Душанбедан Тошкентга қайтиш рейслари эса чоршанба ва шанба кунлари соат 13:00 га белгиланган.
Автобуслар Тошкент автовокзалидан йўлга чиқиб, Сурхондарё вилоятининг Сариосиё тумани орқали Душанбе марказий автовокзалигача ҳаракатланади. Сафар давомийлиги тахминан 15–17 соатни ташкил этади.
Йўловчилар ётоқли ва юқори комфорт даражасига эга автобусларда ташилади. Чипта нархи 315 минг сўм этиб белгиланган.
Шунингдек, чегарадан ўтиш учун йўловчилар хорижга чиқиш паспортига эга бўлиши шарт. Йўловчилар оқимига қараб келгусида қўшимча рейслар йўлга қўйилиши мумкин.
