АҚШ Исроилга F-22 қирувчи самолётларини жойлаштирмоқда

 

АҚШ Буюк Британиянинг Лейкенхит авиабазасидан Исроил жанубидаги авиабазага 11 та F-22 кўп мақсадли қирувчи самолётларини юборди. Аввалги маълумотларга кўра, дастлаб 12 та самолёт учган, аммо улардан бири техник носозлик сабабли қайтиб келган. Бу ҳақда The Times of Israel хабар берди.

 

F-22 самолётлари аввал Буюк Британияга етиб келиб, бир неча кун қолган, сўнгра Исроилга учган.

 

Агентликлар хабарига кўра, АҚШ илгари Яқин Шарқдаги авиабазаларга ўнлаб F-22 ва F-35 қирувчи-бомбардимончи самолётлари, шунингдек, F-15 ва F-16 қирувчи самолётлари ҳамда ўнлаб танкерларни жойлаштирган. Шу билан бирга, юзлаб транспорт рейслари амалга оширилган.

 

Маълумотларга кўра, АҚШ Қуролли кучлари штаб бошлиқлари қўмитаси раиси генерал Ден Кейн ва юқори лавозимли амалдорлар Эронга қарши ҳарбий операциялар хавфи, узоқ давом этиш эҳтимоли ва можароларга олиб келиши мумкинлиги ҳақида огоҳлантирган. 

 

АҚШ президенти Доналд Трамп дипломатик ечимни афзал кўришини билдирган, аммо музокаралар муваффақиятсиз бўлса, бир неча бор куч ишлатиш билан таҳдид қилган. Эрон Исроил ва Америка нишонларига зарбалар билан жавоб қайтаришга ваъда берган. АҚШ-Эрон музокараларининг кейинги босқичи шу ҳафта Женевада бўлиб ўтиши кутилмоқда.