Қўқондаги кўп қаватли уйда портлаш юзасидан жиноят иши очилди
Тергов-тезкор гуруҳи тузилиб, ҳодиса сабабларини аниқлаш ва ҳужжатлаштириш ишлари бошланган.
Фарғона вилояти ИИВ Тергов департаменти хабарига кўра, Фарғона вилояти Қўқон шаҳридаги кўп қаватли уйлардан бирида содир бўлган портлаш юзасидан жиноят иши қўзғатилди.
Фарғона вилояти ИИБ 2-минтақавий ҳудуд Тергов бўлими томонидан жиноят иши Жиноят кодекси 259-моддаси 2-қисми «а» банди (ёнғин хавфсизлиги қоидаларини бузиш одам ўлишига сабаб бўлиши) билан қўзғатилиб, Тергов департаменти назоратига олинган.
Ички ишлар вазири ўринбосари Рамазон Ашропов бошчилигида ҳодиса жойида тергов-тезкор гуруҳи тузилиб, масъул ходимларга ҳодиса жойини Жиноят-процессуал кодекси талабларига мувофиқ ҳужжатлаштириш, иш учун аҳамиятга эга бўлган нарса ва буюмларни олиш, гувоҳлардан батафсил кўрсатмалар олиш, ҳодисанинг келиб чиқиш сабабларини аниқлаш ва бошқа зарур тергов ҳаракатларини амалга ошириш топшириқлари берилди.
Аввалроқ, 25 февраль куни Қўқон шаҳридаги «Бўстон» маҳалла фуқаролар йиғини ҳудудида жойлашган кўп қаватли уйлардан бирида портлаш содир бўлгани, бахтсиз ҳодиса натижасида бир фуқаро бетон қоплама остида қолиб, воқеа жойида вафот этгани ҳақида хабар берилган эди. Бошқа шахсларнинг жароҳат олгани тўғрисида маълумот келиб тушмаган. Ҳодиса оқибатида бир нечта хонадонларга зарар етган.
