Самарқандда МИБ орқали гаровдаги мулк топилиб, хатланди
Маълум бўлишича, фуқаро банкдан олган қарзини тўламай келган. Гаров эвазига қўйилган автомашинасини эса яшириб қўйган.
Фуқаролик ишлари бўйича Каттақўрғон туманлараро судининг 2025 йил 21 июндаги ижро варақасига асосан ундирувчи Капиталбанк фойдасига 13 189 301 сўм миқдоридаги қарздорликни ундириш белгиланган.
Мазкур ижро ҳужжати Мажбурий ижро бюросининг Нарпай туман бўлими иш юритувига келиб тушиб, ижро иши қўзғатилди.
Қарздор Ю.А.га ихтиёрий муддат берилгани ва бир неча бор огоҳлантиришлар юборилганига қарамасдан, қарздорлик белгиланган муддатда қопланмаган.
Ижро ҳаракатлари давомида гаров мулки сифатида расмийлаштирилган “Chevrolet Damas” русумли автотранспорт воситасига қидирув эълон қилинди. Қидирув тадбирлари натижасида мазкур транспорт воситаси қўшни маҳаллада жойлашган фуқаронинг омборхонасидан аниқланди.
Аниқланган автотранспорт воситаси белгиланган тартибда хатланиб, жарима майдонига жойлаштирилди. Айни пайтда ижро ҳаракатлари давом эттирилмоқда.
