Уруш мени “дўстлари йўқ инсон”га айлантирди — Зеленский

 

Украина Президенти Владимир Зеленский уруш унинг шахсий ҳаёти ва дунёқарашига сезиларли таъсир кўрсатганини маълум қилди.

 

Маълумотларга кўра, журналистнинг “уруш сизни қандай инсон қилиб қўйди?” деган саволига давлат раҳбари дастлаб бу саволга аниқ жавоб бериш қийинлигини билдирган. Кейинчалик эса у ўзини “дўстлари йўқ инсон”га айлангандек ҳис қилаётганини қайд этган.

 

Президентнинг таъкидлашича, уруш шароитида у фақат муҳим ва стратегик масалаларга эътибор қаратишга мажбур бўлган. “Дўстларим билан мулоқот қилишга вақтим йўқ, аммо шерикларим, муҳим ҳамкорларим билан доимий алоқадаман. Энди дўстлар ёки шахсий муносабатлар учун вақт қолмаяпти”, — деган у.

 

Украина раҳбари, шунингдек, Россия томонидан бошланган уруш натижасида ўзини янада бардошлироқ ҳис қилаётганини таъкидлаган. Унинг сўзларига кўра, у ҳозир кўпроқ жиддий масалаларга эътибор қаратмоқда.

 

Мазкур баёнот 24 февраль куни Украина, Шимолий ва Болтиқбўйи давлатлари саммитидан сўнг ўтказилган матбуот анжуманида айтилган. Тадбир давомида иштирок этган Европа етакчилари ҳам Зеленскийнинг етакчилик фазилатлари кучайганини қайд этишган.

 

Жумладан, Александр Стубб Украина етакчиси оғир синов шароитида ҳақиқий етакчилик намунасини кўрсатганини таъкидлаган.