Адлия вазирлиги “KIAК9”ни эгасига қайтариб берди
Вазирликнинг маълум қилишича, вақтинча текин фойдаланиб туриш учун таклиф таклиф қилинган автотранспорт воситасидан вазирликда фойдаланиш зарурати қолмаган.
Адлия вазирлиги «ROODELL» МЧЖдан “совға сифатида” қабул қилган KIA К9 русумли автомобилини ташкилотга қайтариб берди. Бу ҳақда Zamon.uz сўровига жавобан Адлия вазирлиги матбуот хизмати маълум қилди.
Жорий йилнинг 12 февраль куни Адлия вазири А. Тошқулов имзоси остида вазирлик «ROODELL» МЧЖ балансида бўлган, 2023 йилда ишлаб чиқарилган KIA К9 PREMIUM русумли автотранспорт воситаси вақтинчалик фойдаланиш учун текин фойдаланиш шартномаси асосида вазирлик қабул қилган. Бу ҳақда «Ревизор» Телеграм канали маълум қилган эди.
Вазир томонидан имзоланган буйруқда Автотранспорт воситасидан фойдаланиш билан боғлиқ ёқилғи-мойлаш материаллари ва техник хизмат кўрсатиш харажатлари амалдаги меъёрларга мувофиқ Адлия вазирлиги ҳисобидан амалга оширилиши белгиланган.
“Формал-ҳуқуқий жиҳатдан, давлат органлари мулкни бепул фойдаланишга қабул қилиши мумкиндир. Лекин давлат хизматида этика ва манфаатлар тўқнашуви масаласи ҳам бор.
Нима учун хусусий компания давлат органига юқори тоифадаги автомобилни бепул тақдим этади? Ҳужжатда бу саволга жавоб йўқ”, - дейилади «Ревизор» Телеграм каналида.
Оргинфо маълумотларига кўра, «ROODELL» МЧЖ автотранспорт воситалари савдоси билан шуғулланиб келади. Ташкилот 2010 йил 10 май куни рўйхатдан ўтган. МЧЖ Тошкент шаҳри, Сирғали туманида фаолият юритади.
Очиқ манбалардаги маълумотларга кўра, бу МЧЖ фаолияти Жиззах вилоятидаги “ADM Жиззах” МЧЖга бориб тақалади.
Шундан сўнг zamon.uz ушбу ҳолат бўйича Адлия вазирлиги Ахборот хизмат бошлиғи Хаёт Қличев билан боғланди.
У бу ҳолат бўйича агар расмий изоҳ керак бўлса таҳририят томонидан расмий хат билан чиқиши кераклигини ва қонунда белгиланган тартибда жавоб қайтаришини маълум қилди.
Zamon.uz 19 февраль куни вазирлик почтасига сўров хатини юборди.
Адлия вазирлиги бугун, 27 февраль куни таҳририятимиз сўровига жавоб қайтарди.
Унда ёзилишича, «ROODELL» МЧЖ томонидан Адлия вазирлигига вақтинча текин фойдаланиб туриш учун таклиф таклиф қилинган KIA К9 русумли автотранспорт воситасини вазирликда фойдаланиш зарурати қолмаганлиги сабабли МЧЖга қайтариб берилган.
