“Арзимас жарима” билан қутилдим деган ҳайдовчи 10 суткага қамалди

 

Ижтимоий тармоқларда ЙПХ ходимининг тўхташ ишорасига бўйсунмасдан ҳаракатланган ҳайдовчи ҳамда ходим томонидан махсус таёқ (палкаси) улоқтирилгани акс этган видео кенг муҳокамаларга сабаб бўлган эди. Орадан кўп ўтмай, мазкур ҳайдовчининг янги видеоси тарқалиб, унда у содир этган қоидабузарлигини “арзимас жарима” билан якунлангани ҳақида фахрланиб гапиргани акс этган.

 

Хабар қилинишича, 2003 йилда Тошкент шаҳрида туғилган, муқаддам маъмурий жавобгарликка тортилган А. Жумаевга нисбатан Жиноят ишлари бўйича Мирзо Улуғбек туман судининг 2026 йил 16 январдаги қарори устидан Мирзо Улуғбек тумани прокуратураси томонидан кассация тартибида протест киритилган.

 

Мазкур иш Тошкент шаҳар судининг жиноят ишлари бўйича судлов ҳайъатида кассация тартибида қайта кўриб чиқилди. Натижада биринчи инстанция судининг жарима қўллаш ҳақидаги қарори бекор қилинди. Бу ҳақда Олий суд матбуот хизмати хабар берди.

 

Суд қарорига мувофиқ, А. Жумаевга Маъмурий жавобгарлик тўғрисидаги кодекснинг 195-2-моддаси (ҳуқуқни муҳофаза қилувчи орган ходимларининг фото ва/ёки видео тасвирини уларнинг обрўсизлантирилишига олиб келадиган тарзда бузиб тарқатиш) билан 10 сутка муддатга маъмурий қамоқ жазоси тайинланди.