Истанбулда ўлдирилган ўзбекистонлик Сайёра учун ғойибона жаноза ўқилди
Маросимда марҳуманинг ота-онаси ҳамда жамоатчилик вакиллари иштирок этди.
Туркиянинг Истанбул шаҳри Умрание туманидаги уйларнинг бирида ўлдирилган Ўзбекистон фуқароси Сайёра Эргашалиева учун ғойибона жаноза намози ўқилди. Бу ҳақда Туркия маҳаллий оммавий ахборот воситалари хабар берди.
Аввалроқ Шишли туманида чиқинди контейнеридан жасади бўлакланган ҳолда топилган Дурдона Ҳокимова билан бир уйда яшаган Сайёра Эргашалиева ҳам айни шахслар томонидан ўлдирилгани аниқланган эди. Унинг жасади ҳам Умраниедаги ўша уйда бўлакларга ажратилгани қайд этилмоқда.
Марҳуманинг ғойибона жаноза намози Шишли туманидаги Фуля маҳалласида жойлашган Фуля Меҳметчик масжидида ўқилди. Маросимда Сайёранинг отаси Баҳром Бўстанов ва онаси Соҳиба Бўстанова, шунингдек, жамоатчилик вакиллари ҳамда масжид жамоаси аъзолари иштирок этган.
Дафн маросимида сўзга чиққан ота-она қизлари хотирасини ёд этиб, Туркия адлия тизимига ишонч билдириб, айбдорларга нисбатан энг қатъий жазо чораси қўлланишини талаб қилди. Улар маросимни ташкил этишда кўмаклашганларга миннатдорлик изҳор этган.
Ҳозирда мазкур жиноят юзасидан тергов ҳаракатлари давом этмоқда. Расмий идоралар томонидан қўшимча маълумотлар эълон қилиниши кутилмоқда.
