Покистон Афғонистонга очиқ уруш эълон қилди
Ҳар икки томондан ҳам кўплаб қурбонлар бор. Таҳлилчилар воқеани икки қўшни давлат ўртасидаги сўнгги ўн йилликдаги энг йирик кескинлашув деб баҳоламоқда.
27 февралга ўтар кечаси Покистон Қуролли кучлари Афғонистон ҳудудидаги Кобул ва Қандаҳор шаҳарларига авиазарбалар берди. Бу ҳақда ҳукумат расмийсига таяниб, ББС маълум қилди.
Покистон бош вазири Шаҳбоз Шариф мамлакат ҳар қандай тажовузкор ҳаракатларга муносиб жавоб қайтаришга қодир эканини таъкидлади. Унинг сўзларига кўра, давлат суверенитети ва ҳудудий яхлитлигини ҳимоя қилиш масаласида муроса бўлмайди ҳамда ҳар қандай таҳдид қатъий чоралар билан қарши олинади.
Бош вазир матбуот котиби Мошарраф Зайдий баёнотига кўра, зарбалар оқибатида 27 та «Толибон» ҳарбий пости вайрон қилинган, тўққизтаси эгаллаб олинган. Шунингдек, 80 дан ортиқ танк, артиллерия воситалари ва қуролли транспорт техникаси йўқ қилингани билдирилган.
Зайдий маълумотига кўра, операциялар давомида 133 нафар «Толибон» аъзоси ҳалок бўлган, 200 дан ортиқ киши жароҳат олган. Шу билан бирга, Афғонистон томони ҳам сўнгги ҳарбий ҳаракатлар давомида қарши томонга сезиларли йўқотишлар етказилганини даъво қилмоқда.
Покистоннинг ҳужуми 26 февраль куни Афғонистоннинг олтита чегара вилоятида, шунингдек, Кобул расман тан олмайдиган Дуранд чизиғи яқинида Покистон ва Афғонистон ҳарбий хизматчилари ўртасида қуролли тўқнашувларига жавоб бўлди.
Покистон мудофаа вазири Хаважа Асиф эса мавжуд вазиятни “очиқ уруш” дея баҳолаб, расмий Исломобод аввал дипломатик каналлар орқали масалани ҳал этишга уринганини, бироқ натижа бермагач, ҳарбий чоралар кўришга мажбур бўлганини маълум қилди.
