“Томонларни дарҳол отишмани тўхтатишга чақирамиз”
Ўзбекистон ТИВ Афғонистон ва Покистон ўртасидаги отишмага муносабат билдирди.
Ўзбекистон Республикаси Афғонистон ва Покистон ўртасидаги чегара ҳудудида вазиятнинг кескинлашаётганидан чуқур хавотирдалигини билдиради. Бу ҳақида Ташқи ишлар вазирлиги баёнот билан чиқди.
Вазирлик томонларни дарҳол отишмани тўхтатишга, вазминликка ва кескинликнинг янада кучайишига олиб келиши мумкин бўлган ҳаракатлардан тийилишга чақирган.
“Ўзбекистон томони юзага келадиган барча келишмовчиликлар фақат тинч йўл билан, сиёсий ва дипломатик мулоқотлар орқали, давлатларнинг суверенитети, ҳудудий яхлитлиги ва ўзаро ҳурмат принциплари асосида ҳал этилиши лозимлигини яна бир бор таъкидлайди”, дейилади расмий баёнотда.
