10-синф ўқувчиси уриб юбориши оқибатида вафот этган ЙПХ ходими сўнгги манзилга кузатилди

Бугун, 28 февраль куни Тошкентда 10-синф ўқувчиси уриб юбориши оқибатида ҳалок бўлган Йўл-патруль хизмати ходими, кичик сержант Хосилбек Эшназаров сўнгги манзилга кузатилди. Бу ҳақида Ички ишлар вазирлиги Жамоат хавфсизлиги департаменти хабар берди.

 

У жорий йилнинг 25 февраль куни пойтахтнинг Миробод тумани Нукус кўчасида бегона транспорт воситасини олиб қочиб, юқори тезликда ҳаракатланаётган вояга етмаган қонунбузарнинг йўлини тўсиб, ўз жонини аямаган ҳолда юзага келиши мумкин бўлган оғир оқибатнинг олдини олган.

 

Қаҳрамонларча ҳаракат қилган ходим оғир тан жароҳатлари олган. Кўрсатилган тиббий ёрдам ва мутахассисларнинг ҳаракатларига қарамасдан, Хосилбек шифохонада вафот этган.

 

ИИВ матбуот котиби Шоҳруҳ Ғиёсовга кўра, 33 ёшли Хосилбек Эшназаров оиланинг кенжа фарзанди, ота-онасининг суянган тоғи, икки қиз ва бир ўғилнинг ишонган қалқони, рафиқасининг севимли турмуш ўртоғи бўлган.

 

“Хосилбекнинг кўрсатган жасорати эса Ички ишлар вазирлиги шахсий таркиби, сафдошлари ҳамда у хизмат қилган халқ қалбида мангу яшайди. Она-юрт ўз қаҳрамон фарзандини ҳеч қачон унутмайди”, дейди Ғиёсов.

 

Айни пайтда ҳолат юзасидан Жиноят кодексининг 267-моддаси (транспорт воситасини олиб қочиш) 1-қисми ва 104-моддаси (қасддан баданга оғир шикаст етказиш) 3-қисми «Д» банди билан жиноят иши қўзғатилиб, гумонланувчи қўлга олинган.