Ҳал қилувчи палладамиз — Ризо Паҳлавий Эрон халқига мурожаат қилди

 

Эрон собиқ валиаҳд шаҳзодаси Ризо Паҳлавий мамлакат халқига мурожаат йўллаб, Эрон “ҳал қилувчи паллага” кирганини таъкидлади. У ўз чиқишида Ислом Республикаси режимига қарши курашнинг якуний босқичи яқинлашаётганини билдирди.

 

Паҳлавий АҚШ президенти томонидан Эрон халқига ваъда қилинган ёрдам етиб келаётганини қайд этиб, бу ёрдам Эрон халқига эмас, балки “зулм аппарати” деб атаган амалдаги тузумга қарши қаратилганини айтди. Унинг таъкидлашича, якуний ғалабага Эрон халқининг ўзи эришади.

 

“Бироқ бу ёрдам келганига қарамай, охирги ғалаба барибир бизники бўлади. Бу охирги жангни биз – Эрон халқи якунлаймиз. Кўчаларга қайтиш вақти яқинлашди”, деган у.

 

Собиқ шаҳзода мамлакат қуролли кучлари, полиция ва хавфсизлик хизматларига мурожаат қилиб, уларни Ислом Республикаси раҳбариятини эмас, балки Эрон ва унинг халқини ҳимоя қилишга чақирди. “Сизнинг бурчингиз халқни ҳимоя қилишдир”, дея таъкидлади у.

 

Маълумот учун, Паҳлавий 1979 йилги Ислом инқилобигача мамлакатни бошқарган Паҳлавийлар сулоласи вакили бўлиб, ҳозирда хорижда яшайди ва сўнгги йилларда ҳукуматга қарши норозилик намойишларини қўллаб-қувватлаб келмоқда.

 

Унинг мурожаати минтақадаги ҳарбий-сиёсий вазият кескинлашиб бораётган бир пайтда янгради. 28 февраль куни Исроил кучлари Эрондаги ҳарбий объектларга зарба берганини Исроил мудофаа вазири Исраэл Катз тасдиқлаган эди. Операциядан сўнг мамлакатда фавқулодда ҳолат эълон қилинган.