Ҳар қандай тажовуз жавобсиз қолмайди — Эрон АҚШ ва Исроилни огоҳлантирди
Ташқи ишлар вазирлиги Исроилга ёрдам кўрсатадиган Яқин Шарқдаги ҳар қандай база Эрон нишонига айланишини маълум қилди.
Эрон Ташқи ишлар вазирлиги АҚШ ва Исроилга нисбатан кескин огоҳлантириш билан чиқиб, Исроилга ҳарбий ёки логистик ёрдам кўрсатаётган Яқин Шарқдаги ҳар қандай база Эрон нишонига айланишини маълум қилди. Бу ҳақда Эроннинг расмий ахборот манбаларидан бири — Тасним хабар берди.
Баёнотда таъкидланишича, мазкур ҳаракатлар АҚШ ва Исроил учун “катта сабоқ” бўлади. Эрон ТИВ тарихий тажрибага таяниб, эронликлар ҳеч қачон хорижий тажовузга бўйсунмаганини ва бу сафар ҳам жавоб қатъий бўлишини қайд этди.
“Эрон музокараларга ҳам, ўзини ҳимоя қилиш учун ҳарбий чоралар кўришга ҳам тайёр. Турли баҳоналар билан амалга ошириладиган ҳар қандай ҳужум жавобсиз қолмайди. Биз ҳудудий яхлитлигимиз ва суверенитетимизни ҳимоя қилиш учун барча мавжуд куч ва ресурсларни сафарбар қиламиз”, дейилади вазирлик баёнотида.
Шунингдек, Эрон БМТ ва бошқа халқаро ташкилотларни вазиятга муносабат билдиришга чақириб, БМТ Хавфсизлик Кенгаши аъзолари можарони тўхтатиш бўйича ўз мажбуриятларини бажариши лозимлигини таъкидлади.
Маълумот учун, 28 февраль куни АҚШ президенти Доналд Трумп АҚШ Исроил билан ҳамкорликда Эронга қарши кенг кўламли ҳарбий операция бошланганини эълон қилган эди. Шундан сўнг Теҳрон, Исфаҳон, Караж ва Кермоншоҳ вилоятида портлашлар қайд этилгани ҳақида хабарлар тарқалди.
