Ўзбекистоннинг Исроилдаги элчихонаси ўзбекистонликларни огоҳликка чақирди
Минтақадаги вазият кескинлашаётгани сабабли гавжум жойларга бормаслик ва маҳаллий кўрсатмаларга амал қилиш тавсия этилди.
Ўзбекистоннинг Исроилдаги элчихонаси Исроил ҳудудида бўлиб турган ўзбекистонликларга мурожаат билан чиқиб, улардан юқори даражада эҳтиёткор бўлишни сўради.
Дипломатик ваколатхона фуқароларга гавжум жойларга бормаслик, заруратсиз айрим ҳудудларда ҳаракатланмаслик, маҳаллий ҳокимият органлари кўрсатмаларига қатъий амал қилиш ҳамда яқинлари билан доимий алоқада бўлиб туришни тавсия этди. Шунингдек, шахсни тасдиқловчи ҳужжатларни доимо ўзи билан олиб юриш муҳимлиги таъкидланди.
Мазкур мурожаат минтақадаги хавфсизлик вазияти кескинлашиб бораётган бир пайтда янгради. Хусусан, АҚШ Давлат департаменти Америка элчихонасининг айрим ходимлари ва уларнинг оила аъзоларига Исроил ҳудудини тарк этишга рухсат берганини маълум қилди. Уларга тижорат авиарейслари мавжуд бўлган даврда мамлакатни тарк этиш тавсия этилган.
Шунингдек, The New York Times нашри фавқулодда чоралар Эрон ҳудудига қарши эҳтимолий ҳарбий амалиётга тайёргарлик билан боғлиқ бўлиши мумкинлигини ёзган. Нашрга кўра, бундай сценарий минтақадаги кескинликнинг янада кучайишига олиб келиши эҳтимолдан холи эмас.
Элчихона Ўзбекистон фуқароларини вазиятни расмий манбалар орқали кузатиб боришга ва хавфсизлик қоидаларига қатъий риоя қилишга чақирди.
