1 мартдан газ нархлари оширилгани рад этилди
Энергетика вазирлиги нархлар ошмаганини, бироқ қиш мавсумида белгиланган ижтимоий меъёр ўзгарганини билдирди.
Ижтимоий тармоқларда 1 мартдан табиий газ нархи ошгани ҳақида хабарлар тарқалмоқда. Бунга Энергетика вазирлиги муносабат билдирди.
Қайд этилишича, 1 мартдан табиий газ нархи оширилмаган. Тўловлар эски тарифда амалга оширилади. Бироқ 1 мартдан бошлаб қиш мавсумида белгиланган ижтимоий меъёр ўзгарди.
Таъкидланишича, иситиш мавсумида табиий газ истеъмоли бўйича базавий меъёр 5 баробарга (100 метр кубдан 500 куб метрга) оширилган эди.
Хусусан, ноябрь — февраль ойларида ҳар бир ой учун 500 куб метргача, март — октябрь ойларида эса ҳар ой учун 100 куб метргача “базавий меъёр” белгиланган.
Бу тартиб Қорақалпоғистон Республикаси ва Хоразм вилоятида октябрь — февраль ойларида амал қилади.
Шу сабабли, бугун, 1 мартдан 31 октябрга қадар ҳар ой учун 100 куб метргача “базавий меъёр” амал қилади.
Эслатиб ўтамиз, Президентимизнинг қарорларига асосан эҳтиёжманд оилаларга ишлатилган электр энергияси ва табиий газ учун давлат томонидан ҳар ойда компенсация берилади.
Жумладан, компенсация миқдори электр энергияси учун — ойига базавий меъёрдан ортиқ (200 кВт·соатдан кейинги) 150 кВт·соатгача, табиий газ учун — қиш ойларида 250 куб метргача, бошқа ойларда 150 куб метргача базавий меъёрдан ортиқ фойдаланилган қисми учун компенсация берилади.
“Илгари компенсациялар фақат қиш ойларида амал қилган бўлса, энди — йил давомида ҳар ойда берилмоқда”, дейилади хабарда.
