Дубайдаги ўзбекистонликлар вақтинчалик рўйхатдан ўтишга чақирилди
Таъкидланишича, бу ахборот хусусиятига эга бўлиб, эвакуация билан боғлиқ эмас.
Бош консулхона Дубай шаҳрида бўлиб турган Ўзбекистон Республикаси фуқароларини вақтинчалик рўйхатдан ўтишга чақирди.
Қайд этилишича, ушбу рўйхатдан ўтиш маълумотларни янгилаш ва Дубай шаҳрида вақтинчалик бўлиб турган Ўзбекистон Республикаси фуқароларининг тахминий сонини аниқлаш, шунингдек, зарурат туғилганда тезкор алоқани таъминлаш учун зарур.
“Сиздан қуйидаги ҳавола орқали ўтиб, вақтинчалик консуллик ҳисобига туриш анкетасини тўлдиришингизни сўраймиз. Эътибор беринг: мазкур ҳисобга олиш фақатгина ахборот хусусиятига эга бўлиб, эвакуация билан боғлиқ эмас”, дейилади хабарда.
Анкетани тўлдириш жараёнида мамлакат ва консуллик муассасасини танлаш бўлимида қуйидагини белгилаш лозим: Ўзбекистон Республикасининг Дубайдаги Бош консулхонаси (ГК РУз В Дубае).
