Эрон президенти телевидение орқали кўриниш берди
У ўз чиқишида АҚШ ва Исроилга жавоб зарбалари давом эттирилишини билдирди.
Эрон президенти Масуд Пезешкиён АҚШ–Исроил ҳужумларидан кейин илк бор жамоатчилик олдига чиқиб, давлат телевидениеси орқали видеомурожаат билан чиқиш қилди.
Мурожаатда у мамлакатда тузилган уч аъзолик муваққат Раҳбарлар кенгаши бугундан бошлаб ўз вазифаларини расман бажаришни бошлаганини маълум қилди. Ушбу кенгаш олий раҳбар ваколатларини янги раҳбар сайлангунига қадар амалга оширади.
Пезешкиён ўз чиқишида Эрон армияси АҚШ ва Исроил томонидан амалга оширилган ҳужумларга жавоб қайтаришда давом этишини таъкидлади. У мамлакат хавфсизлиги ва суверенитетини ҳимоя қилиш давлатнинг устувор вазифаси эканини қайд этди.
Маълумотларга кўра, олий раҳбар Али Хоманаий Исроил–АҚШ ҳужумида нишонга олинганидан кейин мамлакат Конституциясига мувофиқ уч нафардан иборат муваққат раҳбарият кенгаши шакллантирилган. Кенгаш давлат раҳбарининг асосий ваколатларини вақтинча бажаради.
Эроннинг янги олий раҳбарини эса 88 нафар диний уламодан иборат Экспертлар Ассамблеяси сайлайди. Мазкур орган мамлакатда олий раҳбарни тайинлаш ва унинг фаолияти устидан назорат қилиш ваколатига эга.
