Хоманаий вафотидан сўнг минглаб эронликлар кўчага чиқди

Оятуллоҳ Али Хоманаий вафот этгани ҳақидаги хабарлар ортидан Эронда икки хил муносабат кузатилмоқда. Минглаб одамлар уни хотирлаш учун Теҳрон кўчаларига чиққан. Давлатга яқин манбалар ва ижтимоий тармоқларда тарқалган видеоларда айрим зиёратгоҳлар, жумладан Имом Ҳусайн зиёратгоҳи атрофида одамлар мотам тутаётгани акс этган.

 

Теҳроннинг Инқилоб майдонидаги одамлар АҚШ ва Исроил ҳужумларида ҳалок бўлган Оятуллоҳ Хаманаий учун мотам тутмоқда. Исфаҳонда эса ўн минглаб мотамдорлар тўпланмоқда.

 

Кадрларда тўпланганлар марҳум олий раҳбар учун дуо қилаётгани, айрим жойларда эса “Америкага ўлим” ва “Исроилга ўлим” дея шиорлар янграётгани кўринади. Бу ҳолат Эрондаги сиёсий ва жамоатчилик кайфиятининг кескинлашганини кўрсатмоқда.

 

Шу билан бирга, The New York Times нашрининг ёзишича, тунда Теҳрон ва бошқа айрим шаҳарларда катта гуруҳлар кўчаларга чиқиб, Ҳоманаийнинг ҳалокати ҳақидаги хабарни нишонлаган. Нашр бу ҳолатни жамият ичидаги қарашлар турлича эканининг ифодаси сифатида баҳолаган.

 

Эрон расмийлари Оятуллоҳ Али Ҳоманаийнинг ўлими учун қасос олиниши ҳақида огоҳлантирди. Ҳукумат ва Ислом инқилоби қўриқчилари корпуси тарқатган баёнотларда айбдорлар жазосиз қолмаслиги таъкидланди.

 

Эрон ҳукумати баёнотида “тўлиқ куч ва қатъият билан бу жиноятнинг айбдорлари ва ташкилотчиларини қилган ишларидан пушаймон қиламиз”, дейилган. Расмий Теҳрон ушбу ҳодисани оғир жиноят сифатида баҳолаб, тегишли чоралар кўрилишини маълум қилди.