“Ислом олами зудлик билан чора кўриши шарт” — Эрдўған

Туркия президенти Ражаб Тоййиб Эрдўған Исроил ва АҚШнинг Эронга қилган ҳужумларини қоралади ҳамда бу ҳаракатлар Эрон суверенитетини очиқчасига бузишини таъкидлади.

 

Эрдўғаннинг сўзларига кўра, Туркия дўст ва қардош Эрон халқининг тинчлигига таҳдид солаётган бугунги ҳужумлардан қайғуда ва ташвишда. Унинг таъкидлашича, Исроил провокациялари билан бошланган ҳужумлар минтақадаги вазиятни янада кескинлаштирган. Туркия томони узоқ вақт давомида келишмовчиликларни мулоқот йўли орқали ҳал қилишга ҳаракат қилгани, минтақадаги бошқа давлатлар ҳам дипломатик имкониятларини ишга солгани айтилди. Бироқ, Эрдўған фикрича, Исроилнинг жараённи издан чиқаришга қаратилган уринишлари туфайли томонлар ўртасидаги ишонч инқирозини бартараф этиш имкони бўлмаган.

 

Шу билан бирга, Туркия раҳбари Анқара Эроннинг Форс кўрфазидаги биродар давлатларга ҳар қандай сабаб билан ҳужум қилишини қабул қилмаслигини билдирди. У вазиятни барқарорлаштириш учун дипломатик ташаббусларни фаоллаштириш нияти борлигини айтди.

 

Эрдўғаннинг таъкидлашича, Туркия сулҳ тузилиши ва музокаралар қайта бошланиши учун зудлик билан дипломатик ҳаракатларни кучайтиради. У оғир даврда минтақадаги биродар халқларни қўллаб-қувватлаш давом эттирилишини ҳам қайд этди.

 

Президентнинг фикрича, соғлом ақл ва ҳушёр ёндашувсиз дипломатияга йўл очилмайди ва минтақа олов ичида қолиши мумкин.

 

“Уруш кенгаймаслиги, янада кўп қон тўкилмаслиги ва минтақамиз янада кўпроқ азият чекмаслиги учун барча томонлар, энг аввало ислом олами зудлик билан чора кўриши шарт”, — деди Эрдўған.