Покистонда намойишчилар АҚШ консуллигига ҳужум қилди
Полиция билан тўқнашув оқибатида камида бир киши ҳалок бўлган.
Бугун, 1 март куни Покистон жанубидаги Карачи шаҳрида АҚШ консуллиги биносига норозилик намойиши доирасида 500 га яқин киши бостириб кирди. Associated Press агентлигининг хабар қилишича, бу АҚШ ва Исроил томонидан амалга оширилган ҳарбий зарбалар натижасида Эрон олий раҳбари Оятуллоҳ Али Ҳоманаийнинг ҳалок бўлиши ортидан рўй берган.
Акцияда асосан шиа мазҳабига мансуб мусулмонлар иштирок этган, намойишчиларнинг кўпчилиги ёшлар ва фуқаролардан иборат.
Маҳаллий полиция ва ҳарбийлар намойишчиларни тарқатиш учун калтак ва кўздан ёз сиздирувчи газдан фойдаланган. Полиция вакили Муҳаммад Жаводнинг маълум қилишича, тўқнашувлар оқибатида камида бир киши ҳалок бўлган, бир неча намойишчи эса турли даражада жароҳатланган.
Ҳодиса жойида хавфсизлик хизматлари намойишчиларнинг ҳаракатларини назорат қилишга ҳаракат қилган, аммо оммавий тартибни таъминлаш қийинчиликлар туғдирган.
Покистондаги намойишчиларнинг мақсади АҚШнинг минтақадаги ҳаракатларини қоралаш ва Эрон раҳбари учун адолат талаб қилиш эканлиги таъкидланмоқда.
