Саудия шаҳзодаси Трампни Эронга қарши уруш бошлашга кўндирган

Саудия Арабистони валияҳд шаҳзодаси Муҳаммад бин Салмон АҚШ президенти Доналд Трампни Эронга қарши кенг кўламли ҳарбий операция бошлашга кўндиришда муҳим роль ўйнаган. Бу ҳақда вазиятдан хабардор тўрт манбага таяниб, The Washington Post хабар берди.

 

Нашр маълумотларига кўра, Трамп шанба куни АҚШнинг Яқин Шарқдаги ноодатий иттифоқчилари — Исроил ва Саудия Арабистонининг бир неча ҳафта давом этган фаол лобби ҳаракатларидан сўнг Эронга қарши зарба бериш тўғрисида қарор қабул қилган. Манбаларнинг айтишича, Муҳаммад бин Салмон сўнгги бир ой ичида Трамп билан бир неча бор шахсий телефон мулоқотларини ўтказиб, АҚШнинг ҳарбий аралашувини қўллаб-қувватлаган. Бу эса унинг омма олдида дипломатик ечим тарафдори сифатида билдирган баёнотларига зид бўлган.

 

Шу билан бирга, Исроил бош вазири Бинямин Нетаняху ҳам Эронга қарши қатъий чоралар кўриш бўйича узоқ йиллардан бери очиқ кампания олиб бориб келаётган эди. У Теҳронни Исроил учун “экзистенциал душман” деб атаб, АҚШни кескинроқ позиция эгаллашга чақириб келган.

 

The Washington Post’нинг ёзишича, Трамп қарорни АҚШ разведка ҳамжамиятининг баҳоларига қарамай қабул қилган. Разведка ҳисоботларида кейинги ўн йил ичида Эрон кучларининг АҚШ материк ҳудудига бевосита таҳдид солиш эҳтимоли паст экани қайд этилган эди. Шунга қарамай, Оқ уй Эроннинг минтақадаги фаоллиги ва иттифоқчиларга таҳдидини асос сифатида кўрсатган.

 

Шанба кунги ҳужум АҚШнинг 90 миллиондан ортиқ аҳолига эга давлатга нисбатан тўлиқ режимни ағдаришга қаратилган кенг кўламли ҳаракатлардан тийилиб келган кўп йиллик амалиётидан чекиниш сифатида баҳоланмоқда. Таҳлилчиларга кўра, бу қарор Трампнинг аввалги, нисбатан тор доирадаги ҳарбий операцияларидан кескин фарқ қилади ва Яқин Шарқдаги кучлар мувозанатига жиддий таъсир кўрсатиши мумкин.