“Сиз Эрон халқининг қалбини куйдириб юбордингиз”

Эрон Миллий Хавфсизлик Кенгаши котиби Али Лорижоний АҚШ бошчилигидаги сионистлар ҳужумидан омон қолган форс давлати ҳукуматининг энг юқори лавозимдаги вакилларидан бири сифатида чиқиш қилди. У давлат телеканалларида эълон қилган баёнотда Эроннинг қуролли кучлари ўз имкониятлари ва тайёргарлигининг фақат бир қисмидан фойдаланганини, мамлакат ҳукумати ва халқнинг содиқлигини исботлаганини таъкидлади.

 

Лорижонийнинг сўзларига кўра, душман раҳбарларни ўлдириш Эронни беқарорлаштиради деб ўйлаш нотўғри, чунки Эрон халқи ўз раҳбариятига содиқлигини кўрсатган. У шу билан бирга: “Сиз Эрон халқининг қалбини куйдириб юбордингиз, биз эса бунинг эвазига сизнинг қалбингизни куйдириб юборамиз”, деб огоҳлантирди.

 

Мустамлакачи кучлар, Лорижоний таъкидлаганидек, бирор мамлакатга кирганда унинг ресурсларини талон-тарож қилишга ҳаракат қилади ва ҳозирда АҚШдаги ишлар учун масъул шахс бу талончиликнинг тўлиқ рамзидир. Унинг сўзларига кўра, бу вазиятга қарши Муваққат Раҳбарият Кенгаши ташкил этилади.

 

Шунингдек, Лорижоний Эрон халқининг тарихий оғир синовлардан ўтганини эслаб, мамлакатнинг бугунги синовдан ҳам юзи ёруғ чиқишига ишонча билдирди: “Мўғуллар бутун Эронни вайрон қилган, бироқ халқимиз уларга қарши мардонавор курашган. Бу фожиа ниҳоятда аламли; бундай буюк шахс – Оятуллоҳ Али Хоманаийнинг вафоти қалбларимизни яралади ва миллатимизни мотамга чўмдирди. Аммо марҳум Имом айтганидек, бундай шаҳидлик халқни янада собитқадам қилади. Миллатимиз ўзига хос фитратга эга ва иншааллоҳ, бу оғир синовдан ҳам юзи ёруғ бўлиб ўтади”, деди у.