Сурхондарёда ўқитувчилардан пул йиғишни буюрган “замҳоким” ишдан олинди
Ҳозирда унинг ҳаракатларига ҳуқуқий баҳо бериш чоралари қўрилмоқда.
Сурхондарё вилоятининг Жарқўрғон туманида ўқитувчилардан пул йиғиш бўйича топшириқ берган ҳоким ўринбосари ишдан олинди. Бу ҳақида вилоят ҳокимлиги ахборот хизмати раҳбари маълум қилди.
Қайд этилишича, Жарқўрғон туманидаги 33-сонли умумтаълим мактаби педагог ходимларидан пул маблағлари мажбурий тартибда йиғилаётгани ҳақидаги хабар юзасидан тайинланган хизмат текшируви якунланган.
Текширув вилоят ҳокими назоратида ўтказилиб, ҳолатлар комплекс тарзда ўрганилган, ҳужжатлар таҳлил қилинган ва масъул шахсларнинг тушунтиришлари олинган. Натижада Жарқўрғон тумани ҳокимининг ўринбосари Анвар Ражабов томонидан берилган кўрсатма амалдаги қонунчилик талабларига зид экани, хусусан, ихтиёрийлик тамойили бузилгани аниқланган.
Хизмат текшируви хулосасига мувофиқ Анвар Ражабов эгаллаб турган лавозимидан озод этилган. Шу билан бирга, унинг ҳаракатларига ҳуқуқий баҳо бериш учун текширув материаллари белгиланган тартибда ҳуқуқни муҳофаза қилувчи органларга юборилган.
