Ўзбекистонда 2 ойда 22 та уюшган наркожиноий гуруҳ фош этилди
Гуруҳлар ўртача 3 ойдан 10 йилгача вақт оралиғида жиноий фаолият билан шуғулланиб келган.
Жорий йилнинг дастлабки январь-февраль ойларида республикада наркотикларни ўтказиш ва тарқатиш билан шуғулланувчи 22 та уюшган Наркожиноий гуруҳ фаолиятига чек қўйилди. Бу ҳақда Ички ишлар вазирлиги хабар берди.
Қайд этилишича, уларнинг 5 нафар гуруҳ етакчилари, 84 нафар воситачи аъзолари қўлга олинган. Шунингдек, 8 та яширин нарколаборатория фош этилган.
Бу наркожиноятчиларнинг 20 нафари психотроп дориларни, 28 нафари анъанавий наркотикларни тарқатиш билан шуғулланган. 41 нафари синтетик наркотикларни тарқатишни интернет наркодўконлар орқали амалга оширган.
Ўтган 2023 йил давомида 14 та яширин нарколабораториялар аниқланган бўлса, жорий йилнинг январь—февраль ойларида саккизта нарколаборатория аниқланди. Нарколабораторияларнинг учтаси психотроп моддаларни тайёрлаш билан шуғулланган яширин цехлар бўлса, бештаси эса синтетик наркотик моддаларни тайёрловчи нарколабораторияларни ташкил қилган.
Тезкор тадбирлар натижасида январь-февраль ойларида 41 килограмм анъанавий наркотиклар, 100 килограммдан ортиқ синтетик наркотиклар, 1 миллион дозага тенг 200 мингга яқин психотроп дори воситалари ва икки тоннага яқин прекурсорлар ноқонуний муомаладан олиб қўйилди.
Аниқланишича, ушбу уюшган наркожиноий гуруҳлар ўртача 3 ойдан 10 йилгача вақт оралиғида жиноий фаолият билан шуғулланиб келган.
Уюшган наркожиноий гуруҳлар бир йилда ўртача 1 миллион донадан ортиқ психотроп дори воситаларини, бир йил давомида 2-2,5 тонна гашиш ва опий каби наркотик моддаларни ўтказишни амалга оширган. Интернет наркодўкон томонидан бир йилда ўртача 350 килограмм, уч йил давомида 4 миллион дозага тенг бўлган 700-800 килограмм синтетик наркотик моддаларни «закладка» усулида тарқатилган.
Наркожиноий гуруҳлар томонидан турли хилдаги гиёҳвандлик воситаларини Тошкент, Наманган, Андижон, Самарқанд, Сирдарё вилоятларининг жами 40 та туман-шаҳарларида фаол тарзда тарқатиш амалга оширилган. Наркотик моддалар савдоси трансчегаравий ва виртуал характерга эга бўлиб, Афғонистондан Сурхондарё орқали, Қирғизистондан Наманган ва Андижон вилоятлари орқали, Қозоғистондан Тошкент вилояти орқали республика ҳудудига контрабанда йўли билан олиб кирилган.
