АҚШ билан ҳеч қандай музокара олиб борилмайди — Эрон
Теҳрон АҚШ билан музокаралар ўтказиш эҳтимолини қатъиян рад этди ва воситачилар орқали алоқалар ҳақидаги хабарларни асоссиз деб атди.
Эрон расмийлари АҚШ билан музокаралар олиб бориш эҳтимолини қатъиян рад этди. Бу ҳақда Эрон Олий миллий хавфсизлик кенгаши котиби Али Ларижоний маълум қилган.
Унинг таъкидлашича, Теҳрон Вашингтон билан ҳеч қандай музокаралар олиб бориш ниятда эмас. Сиёсатчи бу ҳақда ўзининг X ижтимоий тармоғидаги саҳифасида баёнот бериб, воситачилар орқали мумкин бўлган дипломатик алоқалар ҳақидаги хабарларни “нотўғри ва узоқни кўра билмайдиган” деб атаган.
“Биз Америка билан ҳеч қандай музокара олиб бормаймиз”, — дея ёзган Ларижоний.
У шунингдек, Доналд Трамп сиёсатини танқид қилиб, унинг қарорлари Яқин Шарқдаги вазиятни янада кескинлаштирганини таъкидлади. Ларижонийга кўра, “Америка биринчи ўринда” шиори амалда “Исроил биринчи ўринда” тамойилига айланган ва америкалик ҳарбийлар минтақадаги можароларнинг қурбонига айланмоқда.
Мазкур баёнот The Wall Street Journal нашрида эълон қилинган хабарларга жавобан билдирилган.
Нашрда Ларижоний гўёки Уммон орқали Эрон ядровий масаласи юзасидан АҚШ билан дипломатик маслаҳатлашувларни қайта бошлаш ташаббусини илгари сургани ҳақида ёзилган эди. Бирoқ эронлик сиёсатчи бу маълумотларни қатъиян рад этди.
Аввалроқ эса АҚШ президенти Доналд Трамп Теҳрон Вашингтон билан музокаралар олиб боришга тайёр эканини билдирганини маълум қилган эди.
