АҚШ Кубага қарши ҳарбий операция эҳтимоли кўриб чиқилмоқда

АҚШ маъмурияти Кубага нисбатан эҳтимолий ҳарбий операция вариантларини кўриб чиқмоқда. Бу ҳақда The Atlantic нашри манбаларга таяниб хабар берди.

 

Маълумотларга кўра, Вашингтондаги расмий доиралар Венесуэла ва Эронга қарши амалга оширилган операциялар натижаларини таҳлил қилмоқда. Айнан ушбу операцияларнинг узоқ муддатли оқибатлари Кубага нисбатан кейинги ҳаракатлар бўйича қарор қабул қилишда муҳим омил бўлиши мумкин.

 

Нашр манбаларининг таъкидлашича, Доналд Трамп ва унинг маъмурияти ҳозирги вазиятни ижобий баҳоламоқда ҳамда амалга оширилган ҳарбий-сиёсий чоралар ўз натижасини бермоқда.

 

Шунингдек, Трамп ўзини АҚШ замонавий тарихида аввалги президентлар ҳал қила олмаган муаммоларни еча олган етакчи сифатида кўраётгани қайд этилган. Унинг фикрига кўра, бу сиёсат натижасида АҚШ тарихидаги айрим президентлар — жумладан Ричард Никсон, Джимми Картер ва Роналд Рейган давридаги ютуқлардан ҳам ошиб кетадиган мерос қолиши мумкин.

 

Нашрга кўра, Вашингтон маъмурияти Куба раҳбариятидаги эҳтимолий ўзгаришларни АҚШнинг Ғарбий яримшарадаги таъсирини кучайтириш йўлида муҳим омил деб ҳисоблайди.

 

Ҳозирча асосий сценарий сифатида дипломатик музокаралар ва иқтисодий босим вариантлари кўриб чиқилмоқда.

 

Маълумотларга кўра, АҚШ давлат котиби Марко Рубио Куба раҳбарлари билан юқори даражадаги музокаралар олиб бормоқда.

 

Шу билан бирга, манбалар таъкидлашича, Трамп ҳатто 11 миллион аҳолига эга орол давлатини “дўстона тарзда назорат қилиш” эҳтимоли ҳам муҳокама қилинган.