Эрондаги операция 4 ҳафта давом этиши мумкин — Доналд Трамп

Оқ уй раҳбари Daily Маil'га интервьюсида АҚШ Эрон билан можаролар 4 ҳафта давом этиши мумкинлигини, барчаси режа бўйича кетаётганини маълум қилди. Трампнинг айтишича Эрон раҳбарияти йўқ қилинган. 

 

Америка етакчиси Эрон билан кейинги музокаралар ўтказилишини маъқуллашини, аммо улар қачон ўтказилиши аниқ эмаслигини билдирди.

 

“Эрон музокара ўтказилишини хоҳлаяпти, лекин улар бу ҳақида ўтган ҳафта ўйлаши керак эди”, — дея таъкидлади Трамп.

 

Шунингдек, Трамп 1 март кунги Америка халқига қилган мурожаатида ҳалок бўлган уч нафар америкалик аскар учун “қасос олиш” айтиб, Теҳронга нисбатан янги ультиматум қўйди ва АҚШни унинг “эркинлик” учун курашини қўллаб-қувватлашга чақирди. 

 

Хабарда қайд этилишича, бу  охирги 48 соат ичида миллатга қилинган иккинчи мурожаат ҳисобланади.

 

Бундан олдин, 1 мартда, Оқ уй раҳбари The Atlantic нашрига берган интервьюсида Эрон ҳукуматини тез қарор қабул қилмаганликда айблади. 

 

Исроил ва Қўшма Штатлар 28 февраль тонгида Теҳрон ва Эроннинг бошқа ҳудудларига зарбалар берди. Буни Доналд Трамп Ислом Республикасининг ядровий дастурини йўқ қилмоқчилиги билан изоҳлади. У Эрон армиясини қуролни ташлашга, мамлакат аҳолисини эса “тақдирини ўз қўлига олиш”га чақирди.

Эрон жавобан Исроил ҳудудига ва Яқин Шарқдаги бошқа мамлакатларга зарбалар йўллади. АҚШ Қуролли кучларининг Марказий қўмондонлиги 28 февраль куни Эрон зарбалари натижасида Яқин Шарқдаги Америка объектларига етказилган зарар “минимал” экани ва “операцияларга таъсир қилмагани”ни билдирган эди. 

Бироқ 1 март куни у мазкур зарбалар оқибатида АҚШнинг уч нафар ҳарбийси ҳалок бўлгани, беш нафар ҳарбий эса оғир яралангани ҳақида эълон қилинди.

Исроил-АҚШ ҳарбий операциясининг иккинчи кунида Эрон раҳбарияти зарбалар натижасида мамлакатнинг олий раҳбари Али Хоминаий ҳамда бир қатор юқори лавозимли куч тузилмалари вакиллари, жумладан мудофаа вазири Азиз Носирзода ва Ислом инқилоби муҳофизлари корпуси қўмондони Муҳаммад Пакпур ҳалок бўлганини тасдиқлади.