Исроил армияси Нетаняху офисига ҳужум ҳақидаги даъволарни рад этди
IDFнинг таъкидлашича, IRGC кўпинча ёлғон маълумотлар тарқатади.
Исроил мудофаа кучлари (IDF) Ислом инқилоби қўриқчилари корпуси (IRGC) томонидан Бенямин Нетаняху офисига ҳужум уюштирилгани ҳақидаги даъволарни рад этди. Бу ҳақда RBK хабар берди.
IDFнинг рус тилидаги расмий вакили Анна Уколованинг таъкидлашича, IRGC томонидан тарқатилаётган кўплаб хабарлар ва реал вазият ўртасида кўпинча ҳеч қандай боғлиқлик бўлмайди.
Унинг сўзларига кўра, IRGC ҳақиқатга мос келмайдиган маълумотларни тарқатиши ҳамда бундай хабарларни оммавий ахборот воситалари орқали ёйиши билан танилган.
Шу билан бирга, IDF Эрон ҳудудидан ракета учирилгани аниқланганини тасдиқлади. Шундан сўнг Исроилнинг айрим ҳудудларида ҳаво ҳужуми сиреналари ишга туширилган ва ракеталарни тутиб қолиш тизимлари фаоллаштирилган.
Ҳозирча ушбу ҳужум оқибатида жиддий талафотлар ёки катта зарар қайд этилмагани билдирилмоқда.
Бироқ The Times of Israel хабарига кўра, ракеталардан бири Исроил жанубидаги Беэр-Шева шаҳрига қулаган. Портлаш тўлқини яқин атрофдаги турар-жой биноларига зарар етказган ва 10 киши жароҳат олган.
